16 ЖАСТА НЕГІЗГІ ҚҰРАМДАҒЫ ДЕБЮТ: ТИМУР ҚАЗАНЦЕВ «ШАХТЕР» ТАРИХЫНА ЕНДІ

Тимур – 2010 жылы туған, «Шахтер» академиясының түлегі. 2 қыркүйекте жартылай қорғаушы 16 жасқа толды, ал келесі күні-ақ Бірінші лиганың 21-турында «Хан-Тәңіріге» қарсы өткен матчта (4:0) негізгі команда сапында алғаш рет алаңға шықты. Қазанцев ойынға 82-минутта қосылды. Және алаңға шыққан бойда-ақ жасының оған кедергі емес екенін көрсетті. Тимур алаңға шыққаннан кейін небәрі бір минут өткенде командасына сандық басымдық әперді. Оның әрекетінен кейін «Хан-Тәңірі» ойыншысы Шарипхан Шарапжан сары қағаз алды. Қарсылас футболшысы үшін бұл матчтағы екінші ескерту болды – нәтижесінде ол алаңнан қуылды.

Осылайша, Тимур негізгі команда сапындағы ресми матчтағы алғашқы әрекеттерімен-ақ «Шахтерге» сандық басымдық алуға көмектесті.

Алайда дебютант мұнымен тоқтаған жоқ. Қалған ойын уақытында Қазанцев қарсыластарын бірнеше рет жеке-дара алдап өтіп, тағы бір фол алды.

Тимур үшін бұл шешуші сәттерде жасына мүлдем сай келмейтін салқынқандылық танытқан алғашқы жағдай емес.

Қазанцев «Шахтер» U-17 командасында өнер көрсетеді және 17 турдан кейін QJ League U-17 турнирлік кестесінде бірінші орында тұрған команданың көшбасшыларының бірі.

Осы маусымда Тимурдың еншісінде 17 матчта 8 гол және 5 нәтижелі пас бар.

Маусымдағы ең жарқын сәттердің бірі – 10-турда «Қайраттың» құрдастар командасына қарсы өткен сырт алаңдағы матч болды. 82-минутта «Шахтер» пенальти тебу құқығына ие болды. Ал 15 жастағы Тимур жауапкершілікті өз мойнына алып, он бір метрлік соққыны өзі орындауға шешім қабылдады. Қазанцев салқынқандылық танытып, пенальтиді дәл орындап, командасына маңызды гол сыйлады.

Ал 4-турда «Ақтөбеге» қарсы матчта Тимур жеке шеберлігін көрсетіп, бірнеше қарсыласын алдап өтіп, шабуылды қақпа маңдайшасының астына дәл тиген керемет соққымен аяқтады. Кейін бұл гол 2026 жылдың мамыр айындағы Freedom QJ League U-17 турнирінің ай голы деп танылды.

Енді оның футболдағы тарихында тағы бір ерекше жол пайда болды.

Тимур Казанцев – «Шахтер» тарихында негізгі команда сапында дебют жасаған 2010 жылы туған алғашқы футболшы.

Оған небәрі 16 жас. Бірақ қазірдің өзінде Тимур өз жасындағы футболшылар арасында сирек кездесетін мінезін, өзіне деген сенімін және салқынқандылығын көрсетіп жүр.

«Шахтердің» қатарында алдағы уақытта біз әлі талай рет еститін талант өсіп келе жатқан сияқты.