Қарағандылық «Шахтердің» директорлар кеңесінің төрағасы Рохус Шох команда Қазақстан Премьер-лигасына (ҚПЛ) жолдама алғаннан кейін клубтың алдағы уақыттағы негізгі мақсаттары туралы айтып өтті.
Қарағандылықтар Бірінші лиганың 20-турынан кейін 55 ұпай жинап, ҚПЛ-ға шығу мәселесін мерзімінен бұрын шешті. Олар маусымның аяқталуына алты тур қалғанда Алматының «Қайрат-Жастар» командасынан алты ұпай алда болып, қуғыншылар үшін қолжетімсіз атанды.
— Рохус Рохусович, «Шахтердің» ҚПЛ-ға шығуы Кеншілер күнімен іс жүзінде тұспа-тұс келді. Қарағандыда бұл екі оқиға да бірнеше күн бойы кең көлемде атап өтілді. Бұл кездейсоқтық па?
— Мен мұны кездейсоқтық емес, керісінше «Шахтер» үшін жақсы белгі деп атар едім. Клуб қайта өрлеу кезеңінде тұр, ал ҚПЛ-ға шығу — осы оңай емес жолдағы екінші маңызды қадам. Сондықтан футболшылар мен жаттықтырушылар штабының қарағандылықтар үшін осындай маңызды мерекеге орай мақсатқа жетуі ерекше қуантады.
Команданың алдына қойылған міндетті орындағаны үшін Андрей Финонченко бастаған жаттықтырушылар штабына және бүкіл командаға тағы да алғысымды білдіргім келеді. Сонымен қатар маусымаралық кезеңде команданы басқарған Дмитрий Огайға да ерекше алғыс айтамын. Ол төрт оқу-жаттығу жиынын өткізіп, жігіттерді маусымға жақсы дайындады. Жарыс кезеңінің бүкіл барысында футболшылардың функционалдық жағдайы өте жоғары деңгейде болды.
Сонымен бірге осы маусымда Бірінші лигадағы бәсекелестік аса жоғары болмағанын жақсы түсінемін. Бір жағынан, бұл команданың ешқандай сұрақсыз өз міндетін орындаған жетістігін төмендетпейді. Екінші жағынан, бұл жағдай бізге сабыр сақтауға мүмкіндік береді. Алда әлдеқайда күрделі сынақтар тұрғанын түсінеміз және ҚПЛ-да бәсекелестіктің мүлде басқа деңгейде болатынын білеміз.
— Сіз ҚПЛ-ға шығуды екінші маңызды қадам деп атап өттіңіз. Ал бірінші қадам қандай болды?
— Әлбетте, бұл — «Шахтердің» «Freedom» холдингі тарапынан жекешелендіріліп, Қарағанды облысының меншігінен Тимур Турловтың меншігіне өтуі.
Бұл жерде ең алдымен Қарағанды облысының әкімі Ермағанбет Бөлекпаевқа алғыс айту керек. Ол «Шахтердің» жекешелендірілуіне белсенді түрде ықпал етті. Бірақ бұл үдеріс аяқталғаннан кейін де клубқа инфрақұрылым мәселесінде және басқа да көптеген бағыттарда белсенді түрде көмектесіп келеді, команданы жанкүйер ретінде қолдайды, оның жетістіктеріне шын жүректен қуанады. Өңір билігінің мұндай қолдауы өте маңызды, біз оны сезініп отырмыз.
Әрине, Тимур Турловтың да үлесі зор. Мұнда мәселе тек қаржылық салымдарда емес. Өйткені негізгі командаға арналған бюджет 2025 жылғы деңгейде қалды. Ал қосымша бөлінген қаражат академияға, инфрақұрылымға, түрлі бағыттар бойынша мамандар тартуға және басқа да жұмыстарға жұмсалды.
Мысалы, жөндеу жұмыстарын жүргізіп, жаңа, өте жақсы кеңсеге көштік. Менің ойымша, бұл Қазақстандағы клубтардың ішіндегі ең үздік кеңселердің бірі. Бұл өте маңызды, өйткені мамандар жайлы жағдайда жұмыс істеуі керек, күн сайын жұмысқа қуана келуі қажет.
Бюджет мәселесі, әрине, аса маңызды. Бірақ менің ойымша, Тимур Русланұлының басқаруға деген стратегиялық көзқарасы одан да маңызды. Клуб бұл қысқа мерзімді жоба емес екенін жақсы түсінеді. Ол, былайша айтқанда, «бір бюджеттен екіншісіне дейін» өмір сүретін форматта болмайды.
Тимур Турлов — көреген адам. «Шахтер» мәселесінде ол бірден алыс болашақты көздейді. Оның клубты бірнеше жыл бойы жай ғана инвестор ретінде бақылап, содан кейін шешім қабылдағаннан гөрі, бірден толықтай өз меншігіне алуы да кездейсоқ емес. Бұл бізге тек бүгінгі күнмен өмір сүрмей, клубтың ұзақ мерзімді дамуын жоспарлауға мүмкіндік береді.
— Жоспарлау туралы айтсақ, команда ҚПЛ-дағы орнын рәсімдегеннен кейін жаңа маусымға дайындық бойынша қандай да бір жұмыстар жүргізіліп жатыр ма?
— Біз команда міндетін орындағанға дейін-ақ әрекет ете бастадық. Негізінде, жұмыс көктемде басталды. Маусымдар арасындағы үзіліс өте қысқа, сондықтан күзде ғана қимылдай бастасаң, ештеңеге үлгермейсің.
Бірінші кезекте клуб құрылымында селекциялық-аналитикалық департамент құрдық. Екіншіден, былайша айтқанда, селекция үшін селекция жүргіздік. Яғни штатқа скауттар мен аналитиктерді іріктеп алдық.
Жігіттер жазда команданы нүктелік күшейту жұмыстарына қатысып үлгерді. Сонымен қатар бірден болашаққа жұмыс істеп, әлеуетті жаңа ойыншылардың тізімдерін жасады, матчтарды көрді, Премьер-лигаға бағдарлана отырып футболшылар туралы скауттық есептер дайындады. Бұл Қазақстан футболшыларына да, легионерлерге де қатысты.
Сапалы селекция — «Шахтердің» стратегиялық міндеті. Сондықтан бұл бағыттағы жұмысқа ерекше мән береміз.
Менің ұсынысым бойынша селекциялық қызметке кіріп, оның жұмысын басқарған мамандардың бірі — Владислав Хрущак. Ол жас маман болғанымен, тәжірибесі мол және сараптамалық деңгейі жоғары. Бұл қасиеттері «Шахтерге» пайдалы болады.
Бұған дейін Владислав «Ротор» футбол академиясын басқарды, «Орталық» футбол федерациялары одағының бас скауты болды, көптеген клубтармен селекция бағытында жұмыс істеді, халықаралық турнирлерге тұрақты түрде қатысады. Шығыс Еуропа, Скандинавия және басқа да нарықтармен жұмыс тәжірибесі бар.
Скауттық қызметтің барлық қызметкерлерінің ішінен Михаил Габышевті де ерекше атап өткім келеді. Ол жақында ғана футболшы ретіндегі мансабын аяқтады және қазір өзі үшін жаңа рөлде алғашқы қадамдарын жасап жатыр. Бірақ қазірдің өзінде үлкен пайдасын тигізуде. Қазақстан нарығын жақсы біледі, көптеген футболшылармен жеке таныс, соның ішінде ұлттық құрамада бірге ойнаған ойыншылармен де байланысы бар.
— Сіз бірнеше шетелдік аймақтарды атадыңыз. Осыдан «Шахтер» легионерлерді дәл осы өңірлерден тартатын болады деген қорытынды жасауға бола ма?
— Мен бұл өңірлерді тек біздің мамандарымыздың бірінің тәжірибесіне қатысты атадым. Яғни бұл — клубта қазірдің өзінде бар білім мен тәжірибе. Әрине, біз тек осы аймақтармен шектелмейміз.
Қазір үлкен жұмыс жүргізіліп жатыр. Жігіттердің тізімінде әлеуетті үміткерлердің бірнеше жүзі бар. Жасырмаймын, ең алдымен еркін агенттерге және келісімшарттарында оны мерзімінен бұрын бұзу мүмкіндігі қарастырылған футболшыларға қараймыз.
Сапалы қазақстандық футболшылардың тапшылығын жақсы түсінеміз. Бірақ жалақы бойынша бәсекеге араласуды жоспарлап отырған жоқпыз.
Әрине, қазіргі маусымда өзін жақсы көрсеткен ойыншыларға, соның ішінде өз жастарымызға да сенім артамыз. Алайда оларға бәсекелестік деңгейі арта түсетін жағдайда өздерінің мықтылығын қайтадан дәлелдеуге тура келеді.
Клубтың дамуы жоспарлы түрде жүреді. Біз өз мүмкіндіктерімізді де, бәсекелестеріміздің мүмкіндіктерін де шынайы бағалаймыз. Өзімізге ешқандай аса жоғары немесе орындалуы қиын міндеттер қоймаймыз.
— Клуб академиясының жоспарлары қандай?
— Толыққанды академия қазір салынып жатыр. Бірақ қазіргі уақытта да тәрбиеленушілеріміз үшін жеткілікті жақсы жағдай жасағанымызды атап өткім келеді. Сапалы селекция жүргіздік, жасөспірімдер командаларының нәтижелері жақсарды. Қазірдің өзінде Қазақстанның әртүрлі өңірлерінен балалар біздің академияға келуге қызығушылық танытып отыр.
Бұқаралық футболды дамыту бағытында Қарағанды облыстық футбол қауымдастығымен өте тығыз жұмыс істеп жатырмыз. Бұл бағыттағы жұмыстар алдағы уақытта да жалғасын табады.
Шахтёр
Хан-Тәңірі
