Командалардың дайындығы заманауи талаптарға сай ұйымдастырылған. Жаттығу үдерісі екі мезгілдік жаттығуларды, теориялық сабақтарды және қалпына келтіру шараларын қамтиды. Негізгі басымдық техникалық-тактикалық дайындыққа, ойынның барлық компоненттеріндегі сапаны арттыруға және командалық байланыстарды қалыптастыруға берілген. Жүктемелердің қарқындылығы футболшылардың жас ерекшеліктерін ескере отырып, кезең-кезеңімен арттырылуда.
«Шахтёр» академиясының үйлестірушісі Максим Жалмагамбетов клуб басшылығы тарапынан жасалған сапалы жағдайлардың маңыздылығын атап өтті:
«QJ League-де өнер көрсететін жас ерекшелік топтары үшін бүгінгі таңда Қазақстанда мүмкін болатын ең жақсы жағдайлар жасалған деуге болады. Сонымен қатар, Қарағандыда әзірге толыққанды инфрақұрылымның жетіспейтінін де айту керек. Жаттығу үдерісінің басым бөлігін балалар қар үстінде өткізуге мәжбүр, сондықтан Астанаға оқу-жаттығу жиындарына шығу біз үшін нағыз серпіліс. Мұндай жағдайлар QJ League алдағы маусымына жоспарлы әрі сапалы дайындалуға мүмкіндік береді».
Академияда жас футболшыларды дамытуға және негізгі команда үшін кадрлық резерв қалыптастыруға ерекше көңіл бөлінуде. Қазірдің өзінде «Шахтёр» тәрбиеленушілері Қазақстанның жасөспірімдер құрамаларына тұрақты түрде шақырылып жүр. Бұл өңірдің жоғары әлеуетін және академияда жүргізіліп жатқан жүйелі жұмысты айқын көрсетеді.
Маусымға дайындық QJ League жарыстарына қатысуға бағытталған. Клубта командалық нәтижелер тұрғысынан да, футболшылардың жеке дамуы жағынан да ең жоғары мақсаттар қойылып отыр. Негізгі басымдық — болашақта «Шахтёрдің» негізгі құрамын күшейте алатын және ел намысын халықаралық деңгейде қорғайтын футболшыларды тәрбиелеу.
Өткен маусым жасөспірім командалар үшін талдау мен өсудің маңызды кезеңі болды. Қателіктерге талдау жасалып, даму бағыттары айқындалды. Жаңа чемпионатта ұжымдар жоғары орындар үшін күресуге дайын. Командалар маусымға үлкен мотивациямен және қойылған мақсаттарды нақты түсіне отырып келуде.
«Шахтёр» U-17 жасөспірімдер командасының бас бапкері Игорь Александрович Солошенко Астанадағы оқу-жаттығу жиындарының барысы, маусымға қойылған мақсаттар және клуб инфрақұрылымын дамытудың маңыздылығы туралы айтып өтті:
«Астанадағы жиындар жоспарға сай өтіп жатыр, барлық белгіленген жұмыстар атқарылуда. Бізде тамаша жаңа манеж бен өте жақсы жағдайлар бар, сондықтан мұнда келгенімізге қуаныштымыз. Жігіттер екі мезгілдік режимде жұмыс істейді, теориялық сабақтарға арналған зал бар. Жаттығулардың қарқындылығы біртіндеп артуда. Жаттығу үдерісінің негізгі бағыты — техникалық-тактикалық дайындық пен командалық өзара әрекеттестікті жетілдіру. Сондай-ақ ойынның барлық фазаларындағы сапаны жақсарту бойынша жүйелі жұмыс жүргізілуде».
«Шахтёр» U-17 жасөспірімдер командасының ойыншысы Расул Акимов та оқу-жаттығу жиындары туралы пікір білдіріп, команда мен жеке мақсаттарын атап өтті:
«Өзім үшін мақсат — Қазақстан құрамасында ойнау, QJ League All Star қатарына ену және командамен бірге чемпион атанып, Лига чемпиондарында ойнау».
«Шахтёр» футбол клубы академияны дамыту жұмысын жалғастырып, жас футболшыларды сапалы даярлауға барлық жағдай жасап келеді. Бұл — клубтың болашақтағы табыстары мен жалпы қазақстандық футболдың дамуына берік негіз.
Шахтёр
Түркістан
