РАФАЭЛЬ ХАМИДУЛЛОВ: «Жеңіс – бұл атқарылған жұмыстың жағымды нәтижесі»

Команданың бас бапкері турнирдің және өткен оқу-жаттығу жиындарының қорытындысын шығарды.

— Турнир кестесі өте тығыз болды: біз бес ойынды күнара өткіздік. Соған қарамастан, қысқа мерзімді турнир жақсы деңгейде өтті. Біз үшін ең маңыздысы – ойыншыларға артық жүктеме түсірмеу болды. Сондықтан ойындарда құрамды жиі ауыстырып, ротация жасауға тырыстық.

Турнирге келген барлық командалар жоғары дайындықпен және үлкен жігермен ойнады. Сол себепті бірде-бір жеңіл ойын болған жоқ. Біз бес матч өткізіп, бес жеңіске жеттік. Алайда біздің басты мақсатымыз міндетті түрде жеңу болған жоқ. Жеңіс – бұл атқарылған жұмыстың жағымды нәтижесі.

Турнир барысында барлық ойыншыларды толық қарап шықтық. Олардың функционалдық дайындығын, тактикалық сауаттылығын, алаңдағы өзара әрекетін, сондай-ақ қысым жағдайында қалай әрекет ететінін бағаладық. Жалпы алғанда, турнирдің қорытындысына көңіліміз толады. Кейбір ойыншылар аздау ойын уақытына ие болды, бірақ оның объективті себептері бар.

Әсіресе қақпашылардың ойыны қуантты. Үш қақпашымыз да турнирді жоғары деңгейде өткізді. Соның нәтижесінде бес матчта бар болғаны бір ғана гол жібердік. Барлық ойыншылар жоспарланған ойын тәжірибесінің қажетті көлемін алды.

Қарағанды футболының тарихында алғаш рет жасөспірім командалар оқу-жаттығу жиындарына шығу мүмкіндігіне ие болып отыр. Бұл – дамуға өте қажет нәрсе. Бізге сапалы дайындық жүргізу үшін барлық жағдай жасалды.

Желтоқсан айынан бастап біз «Биик» базасында дайындалдық. Онда нәтижелі жұмыс істеуге барлық мүмкіндік бар. Сонымен қатар Астанада жаңа жабық манежде де оқу-жаттығу жиынын өткіздік. Ол жерде де жоспарланған жұмыс толық орындалды. Бұл біздің үшінші оқу-жаттығу жиынымыз болды және ол «Арман» турниріне қатысумен жалғасты.

Біз екі реттік жаттығу режимінде жұмыс істедік. Мұндай дайындық өз нәтижесін беруде. Ойынның көптеген фазаларын жақсарта алдық және команданың функционалдық жағдайы айтарлықтай көтерілді.

Биылдан бастап біз жаттығу залын да белсенді қолдана бастадық, ойыншылар салмақпен жұмыс істеуде. Соның арқасында команданың физикалық дайындығы артты: біз күштірек, жылдамырақ әрі тактикалық тұрғыдан икемдірек бола түстік. Бұл – клуб ұйымдастырған оқу-жаттығу жиындарының нәтижесі.

Жаңа маусымның басталуын асыға күтіп отырмыз. Чемпионатқа толық дайын күйде келеміз деп сенемін. Одан әрі барлығы өзімізге байланысты болады. Біз жеңіске жетуді қалаймыз және соған менталдық тұрғыдан дайынбыз.

Чемпионаттың басталуын үлкен үмітпен күтіп отырмыз және бізге артылған сенімді ақтаймыз деп үміттенеміз.