РОХУС ШОХТЫҢ ТАБЫС ФОРМУЛАСЫ

Облыс әкімімен бірге Рохус Шох салынып жатқан «Шахтер» академиясында, сондай-ақ Freedom Holding Corp. компаниясы мен оның бас атқарушы директоры Тимур Русланұлы Турловтың ауқымды қолдауымен қайта жаңғыртылып жатқан Сортировка шағынауданындағы «Локомотив» стадионында болды. Сонымен қатар олар «Шахтер» орталық стадионын қайта жаңғырту жұмыстарының барысымен танысып, «Шахтер» академиясының базасында тәрбиеленушілерге арналған жатақхананы, асхананы және демалыс аймақтарын аралады. Жас футболшылардың тұруы мен дайындалуына жасалған жағдайларға ерекше назар аударылды. Қонақтар заманауи тұрмыстық жағдайлар, сапалы білім беру ортасы мен кәсіби жаттығу процесі жас спортшылардың жан-жақты дамуының маңызды құрамдас бөлігі екенін атап өтіп, академия инфрақұрылымына жоғары баға берді.

Балалар мен жасөспірімдер футболын дамытуға Рохус Шохтың жеке қосқан үлесі ерекше атап өтуге тұрарлық. Оның бастамалары мен Freedom QJ League жобасын жүйелі қолдауының арқасында Қазақстанда жаңа буын футболшыларын тәрбиелеуге арналған заманауи жағдайлар жасалып, талантты балаларға қосымша мүмкіндіктер ашылып, өңірлердің спорттық инфрақұрылымы нығайып келеді.

Рохус Шохтың айтуынша, оның Қарағандыға сапары жұмыс сапары болды: «Менің бұл сапарым – күнделікті жұмысымның бір бөлігі. Сапар өте нәтижелі өтті, әрі “Шахтер” академиясының даму қарқынына көңілім толады. Әсіресе Қарағанды облысының әкімі Ермағанбет Бөлекпаевпен кездесу маңызды болды. Ол біздің бастамаларымызға жан-жақты қолдау көрсетіп келеді. Біз балалар мен жасөспірімдер футболын дамыту, өңірдің спорттық инфрақұрылымын жетілдіру және бірлескен жобаларды жүзеге асыру мәселелерін талқыладық.

Мен үнемі айтып жүремін: табыстың формуласы – мемлекет пен бизнестің күш біріктіруінде. Бір жағынан – Freedom Holding Corp. компаниясы мен оның бас атқарушы директоры Тимур Русланұлы Турловтың жеке инвестициялары, екінші жағынан – спорт инфрақұрылымын дамытуға қаржы бөліп отырған әкімдіктің қолдауы мен өзара тиімді ынтымақтастығы. Осындай серіктестік жас спортшыларды тәрбиелеуге мүмкіндік беріп, түптеп келгенде, дені сау ұлт қалыптастыруға ықпал етеді.

Мен Академияның барлық нысандарын аралап шықтым, жаттықтырушылармен және тәрбиеленушілермен кездестім, жұмыстың қалай ұйымдастырылғанын көріп, ұжыммен маңызды мәселелерді талқыладым. Біз клубтағы жұмысымызды тек қаңтар айында бастадық. Соған қарамастан, аз уақыттың ішінде орасан зор жұмыс атқарылды. Қызметкерлеріміздің еңбегінің арқасында Академия қарқынды дамып келеді.

Бүгінде мұнда Қазақстанның түкпір-түкпірінен балалар келуге ұмтылады. Бұл біздің жұмысымызға деген сенімнің айқын көрінісі. Дәл осы балалар – клубтың ғана емес, бүкіл қазақстандық футболдың болашағы. Алайда ең бастысы – олардың барлығы кәсіби футболшы болмауы мүмкін, бірақ олардың дені сау, тәртіпті, футболды сүйетін азамат болып қалыптасатыны маңызды. Ертең олар өз балаларын да футболға алып келеді. Бұл – Қазақстанның болашағына, дені сау әрі қуатты ұлт қалыптастыруға қосылған үлес».

Қарағанды облысы үшін жүзеге асырылып жатқан жобалардың спорттық қана емес, әлеуметтік маңызы да зор. Спорт нысандарын салу және қайта жаңғырту, балалар футбол академияларын дамыту, сондай-ақ Freedom Holding Corp. қолдауымен спорттық инфрақұрылымды жаңғырту – өскелең ұрпақтың денсаулығына, тәрбиесіне және болашағына салынған инвестиция.

Freedom Holding Corp. компаниясы мен оның бас атқарушы директоры Тимур Русланұлы Турловтың қолдауымен Рохус Шох пен Freedom QJ League жүзеге асырып отырған жұмыстар бұқаралық футболды дамытуға, сапалы спорт резервін қалыптастыруға және Қарағанды облысы мен Қазақстанның намысын республикалық әрі халықаралық деңгейде лайықты қорғайтын жаңа буын футболшыларын тәрбиелеудің  берік негізін қалайды.