Қазіргі уақытта академияда 2009, 2010 және 2011 жылы туған 12 ойыншы тұрып жатыр. Олар алдағы маусымда QJ League турнирінде өнер көрсетеді. Қарағандыға Павлодар, Астана, Тараз, Талдықорған және Қостанай қалаларынан жас спортшылар келді. Бұрын негізгі құрам ойыншылары тұрған спорттық база 27 орынға есептелген.
Тәрбиеленушілер үшін барлық қолайлы жағдай жасалған: тұру, тамақтану ұйымдастырылған, сондай-ақ оқу сабақтарына дайындалуға арналған арнайы бөлме бар.
Академияның жаңа ойыншыларының бірі — Қостанайдан келген U-17 командасының футболшысы Амир Оспанов.
«Барлығы жоғары деңгейде, жағдай өте жақсы. Әсіресе командадағы бірлік пен достық атмосфераны атап өткім келеді. Білікті мамандар жұмыс істейді, ал әртүрлі қаладан келген жігіттер тез тіл табысып кетті. Осындай жағдаймен жоғары нәтижелер туралы ойлауға болады», — деді ол.
Академия басшылығы жас футболшыларға қолайлы жағдай жасау олардың дамуы үшін маңызды факторлардың бірі екенін атап өтті.
Академия жетекшісі Сергей Якушин бұл бастама ойыншылардың дұрыс спорттық режим қалыптастыруына мүмкіндік беретінін айтты.
«Біз талантты тәрбиеленушілерімізге тұру және тамақтану мүмкіндігін ұсына алғанымызға өте қуаныштымыз. Бұл спортшының дұрыс режимін қалыптастыруға көмектеседі: тамақтану, ұйқы, жаттығу және қалпына келу. Осындай кешенді тәсіл кәсіби футболшыларды даярлау үшін өте маңызды», — деді ол.
Сергей Якушиннің айтуынша, ойыншыларды іріктеу кезінде география шешуші рөл атқармайды.
«Біз үшін футболшының қай қаладан келгені маңызды емес. Егер ол академия деңгейіне сәйкес келсе, біз оны қуана қабылдаймыз. Қазір селекциялық жұмыс жалғасуда — командада көргіміз келетін ойыншыларды анықтап, оларды шақыратын боламыз. Академияның әрі қарай дамуына барлық мүмкіндік бар, сондықтан болашаққа үлкен сеніммен қараймыз», — деді ол.
Соңғы екі айдың ішінде академияда бұрын болмаған жағдайлар жасалды: тұру, тамақтану, толыққанды жаттығу процесі және оқу ұйымдастырылды.
Сонымен қатар тәрбиеленушілердің біліміне ерекше көңіл бөлінеді. Академия мектептермен ынтымақтастық туралы меморандумға қол қойып, балалардың білім беру жүйесіне толыққанды интеграциялануына және әлеуметтік қорғалуына мүмкіндік жасады.
Спорттық базаның ашылу салтанатында клубтың спорттық директоры Арсен Инкарбеков сөз сөйледі.
«Жігіттер, мұның бәрі сіздер үшін жасалып жатыр. Біз сіздердің тек футболға көңіл бөлулеріңіз үшін барлық қолайлы жағдайды жасап жатырмыз. Жаттығып, клубымыздың абыройын асқақтатыңыздар. Біз бір отбасы сияқтымыз, сондықтан бірге алға — жаңа жеңістерге ұмтылуымыз керек», — деді ол.
Тәрбиеленушілерді қоныс тойымен құттықтауға негізгі құрамның қақпашысы Игорь Шацкий де келді.
Іс-шара соңында клуб өкілдері әйелдерді келе жатқан Халықаралық әйелдер күні мерекесімен құттықтап, олардың клуб пен қоғам өміріндегі маңызды рөлін атап өтті.
Шахтёр
Түркістан
